Sihkkeliiguin Sámis
Guovdu Ohcejoga meahcceguovllu mannet dološ máđiijat, maid mielde dolin johte. Giliid gaskii leat das maŋŋá ráhkaduvvon geainnut, muhto boares máđiijat ja geainnut dolvot meahcce- ja vánddardansihkkelasti ain áidalas meahccelundui. Guovllu kulturbáikkit gávdnojit sihkkelgeinnodagaid guoras. Meahcis leat boares bigálusbáikkit ja sieiddit.
Gáibádusdási dahje oidnosiid dáfus seammalágan guovllu sihkkelastimii it Suomas gávnna. Eanahámit dahket Ohcejogas sihke meahcce- ja vánddardansihkkelastii áidnalunddot guovllu. Vánddardansihkkelastit johtet eanaš geainnuid mielde, meahccesihkkelastit fas namaset mielde meahcceguovllus. Ohcejogas gávdnojit sihke álkis ja oalle váttis geinnodagat.
Sáhtát válljet earet eará 10–15 sierralágan beaivemáhce meahccesihkkelastingeinnodagas, main oanehepmosat leat 15 kilomehtera guhku. Dasto gávdnojit maid guhkit geinnodagat vánddardan- ja meahccesihkkelastimii. Ohcejoga eatnamat molsašuddet johkalegiin duottareatnamiidda. Máŋggain geinnodagain beasat vuodjit biillain geainnu mielde badjeeatnamiidda, gos sáhtát joatkit njuolga meahcceguvlui.
Vánddardansihkkelastimii heive vaikkoba johtin Ohcejoga golmma gilis, Njuorggámis Ohcejoga girkosiidii ja doppe Gáregasnjárgii dahje nuppegežiid Suoma čábbasamos geaidnun adnojuvvon Deanugeainnu mielde. Ovtta guvlui mátki lea 145 kilomehtera. Ohcejoga giliin vuolgi geinnodagaid sáhttá álkit guhkidit nu ahte johtá oasi mátkkis Norgga bokte. Ohcejoga girkosiiddas beassá Njuorggámii maid meahcceguovllus sihkkelastimiin, goas mátkin boahtá badjel čuođi kilomehtera.
Meahccesihkkelastináigi álgá Ohcejogas geassemánu beallemuttus. Árabut duoddariin sáhttá leat vel muohta, ja eana sáhttá leat njuoskkas ja dimis. Buoremus sihkkelastináigi lea borge-čakčamánnu, goas temperatuvra lea muttát. Ruškeáigi lea dalle álgimin eaige divrrit šat hehtte.
Sihkkelastin heive asttuáiggeájánassan erenomážit daidda, geaid fárta geasuha ja daidda, geat hálidit johtit guhkit mátkki beaivvis. Geinnodat meroštallá dan, man olu vuimmiid dárbbaša. Sihke vánddardan- ja meahccesihkkelastin heive buohkaide. Sihkkelasti meroštallá ieš, mii lea muttágis mátki.
– Luondu, viiddisvuohta, eatnamat, kultuvra ja jaskatvuohta dahket Ohcejogas erenomáš guovllu. Dušše Ohcejogas sáhtát vuolgit dákkár meahcceguovlluide sihkkelastit almmá ahte dárbbašat váldit sihkkeliid ja dehálamos biergasiid lassin ee. tealttá fárrui. Meahccesihkkelastiige heivvolaš vuoiŋŋastansajit gávdnojit gasku meahcceguovllu. Ja dat oidnosat – dákkáriid ii eará sajis Suomas gávnna, nanne Tapio Lepikkö, guhte iešge lea áŋgir sihkkelastit.